رسالة الى الوالد الملك عبدالله

khaled · 25-Feb-2008, 04:18 PM

السلام عليكم

بصراحة الموضوع هذا خطير جدا جدا

ويكسر الخاطر لكن للاسف هذا الواقع

مو انا الي كاتبه لكن الي كااتبه كتبه من قلب

اخليكم مع الرسالة

أوجه رسالة للوالد القائد خادم الحرمين الشرفين

(حفظه الله وأطال في عمره)) )
من واجبات الأبووووه أن الأب يستمع لصرخات أبنه ويضمه على صدره وإذابة كل آلامه
والملك زي أبوي،، لاأحد يتدخل بين أب وطفله
@ @ @
أبشرك يا خادم الحرمين الأسعار مضبوطة

والمواد الغذائية متوفرة
ما نقصنا بس إلا الخبز يرفعون سعره لاتراهم رفعوة أمس
وخذ عندك بعض الأسعار
قشطة المراعي صارت 4 ريال
حبة المظبي 22 ريال
الكفرات أرتفعت 30 بالميه
الأدوية 25 بالمية
تخيل يا خادم الحرمين

جبن كرافت والمراعي السايل أرتفع
طيب وش نسوي لبزارينا المشكلة يقدرون الكرافت السايل مع الصامولي يعني وش نفطر الطحين زاد والبيض زاد حتى الشابورة
الببسي صار 20.5
والأيجارات أرتفعت
وقسايم المرور زادت
الحمدلله على النعمه أمن وآمان
الله لا يغير علينا
حتى رز أبو كاس أرتفع
لا وأزيدك من الشعر بيت رزمة الكراث والبصل صارت بريالين
شفت شلون حنا بنعمه

@ @ @
بس تكفى كلمة راس..؟؟؟

ما ودك.. تنزل رواتبنا شوي..؟؟؟

عشان.. نبني للأردن 70 ألف وحده سكنيه ثانيه!!!
ونعطي لبنان مليار ونص دولار!!!
ونرسل لمصر المعونه السنويه!!!

ولايهون أهل المغرب اللي بعض المناطق الكهرب ببلاش !!عشان الصيد يطلع لة طعم !!! أجل غزلان ببلاش !!

وحنا ضبان وجرابيع وواجد علينا ناحسونا فيها...لا وصار فترة صيد يامال الفقر !!!

ونرسل أعانة لساوث كالوراينا ونبني لهم مرة ثانية مثل أرامكو السعودية في نيوأورلينز!!

اللي مازادت موظفينها شئ بس ترسل عيال الأجانب

يدرسون ويتعالجون في أحسن الجامعات والمستشفيات وتتبرع لأمريكا بأكثر من مليارين غير بناء 2500 وحدة سكنية للمساكين وحنا أة من الحنا تراة غلا بعد يخلف اللة علينا ننتظر اللة لايقول زلزال يمكن الجماعة يعطفون ويعطون فلل زي رعاة البقر

وياقلب لاتحزن !!!
تعرف ماشاء الله حنا..؟؟؟

من كثر الفلل التمليك..؟؟؟

الناس صارو يأجرون ببلاش
ممكن طلب طال عمرك.. أبي سلف 12000 ريال لأخر العطلة نبغى الفقع مبطين عن الفقع !!!

يافقعي فقعاة؟؟؟
عندي دين أسدد فيه لي سنه ولا خلص.. كل شهر 500 ريال
الله يرحم حالنا والله..
@ @ @
أبشرك طال عمرك
قبل كم يوم حطم سعر برميل البترول الرقم القياسي وصار يباع بـ 99 دولار
ورصيدي أيضا حطم الرقم القياسي في نفس اليوم وصار فيه 17 ريال
الحمد لله شفت كيف أنا بخير وشعبك بخير

اللة يرحم زايد والعمر زايل اللي قال عز شعبك يعزك وربعنا ذل شعبك يمشي وراك بس ربك فوق ويمهل ولايهمل

ياحسابات سويسرا وصفقات الطايرات الخربانة والمشاريع الوهمية

@ @ @
أحب أطمنك صرنا نسوي رجيم غصب عنا
تعرف اللحم ما عاد نعرفه عقب ماذبحنا الكرم ألحين الواحد معاد عندة عشان يعزم
حتى الدجاج ما عاد نأكله
صرنا رشيقين
تسمع بالكرش ما عاد نشوفها
تسمع بالبطن اللي لاصق في الظهر
يوووووه في كل مكان نشوفه
نم قرير العين الشعب بخير
لاتتعب نفسيا وتدور في النت توأم تفصلهم
توائمنا ليش ينفصلووون
صلة الرحم زينه

خلهم يتشابكون طول العمر
يمكن لو فصلناهم يتهاوشون ويفترقون
خلهم متشابكين في جسد واحد
الله لا يغير علينا
@ @ @
أبشرك طال عمرك شعبك تطور
أستبدل البكاء بطعم الملح؟؟؟

ببكاء بطعم الدم؟؟؟
آآآآآآآآآآآآآآه يا حلو مذاقه
ودك تجربه؟؟؟
أنا أقولك وشلون؟؟؟
نظف منزلك من حليب الأطفال!!!

والبامبرز عشان تطلع الريحة صح وتعرف معنى الحياة
نظف جيبك من الفلوس؟؟؟
نم ومخباك فاضي؟؟؟
خل زوجتك تصحيك من النوم قبل الفجر
وتقولك أن طفلك ما عنده حليب
دق الشماغ ولف على جيرانك
دور سلف.. علشان تشتري حليب لطفلك
الجميع بيطردك لأنهم طفارى كلهم
أنس أنك ملك وأرجع للبيت
بتدخل على أنغام بكاء طفلك
عندها ستحتقر نفسك وأنت عاجز عن أشباع طفلك
عندها ستلعن اليوم اللي أنولدت فيه
عندها ستلعن اليوم اللي أنولد طفلك وصرت مسؤول عنه؟؟؟

عندها ستضمه وستبكي من القهر
ستنزل دموعك وتحس بطعم الدم في حلقك

وتستغفر ربك لأن الجوع كافر والطفرة طق أصبع وهبال على خبال والنتايج قريبة !!!

سوف يكثر الفساد والطمع والسرقة في عز النهار والقتل والقوي ياكل الضعيف
@ @ @
تذكر طال عمرك يوم حنا صغار وش كانو يقولون لنا
كانو يقولون الرجال ما يبكي
عيب تطلع دموعه
صرنا نصيح عادي
البكاء صار ملازم لنا
والسبب كومة لحم (أطفال ونساء) في رقبة الواحد
يبكي لأنه عاجز عن توفير الحياة الكريمة لهم
@ @ @
بس ودي أقولك شي قبل ما أروح وأصيح
تدري وش معنى الرجل يبكي قدام زوجته وأطفاله
معناها تساقط كل قيم الرجولة والوطنية اللي تعلمناها في طفولتنا
معناها إحساس المرأة بالأنكسار وعدم الأمان
معناها خنوووووع ما بعده خنووووع للظروف القاسية اللي وضعنا فيها
معناها أمور كثيرة ما راح تفهمها..
///////// /////////////////

أرسلها لكل من تعرف عسى أن يصل صوت المعاناه الى مليكنا

فيعرف مدى سعادتنا وفخرنا بوطنيتنا

منقول

**نادر** · 25-Feb-2008, 04:31 PM

وربي شوي وبصيح ...

الله ير....ه .. ويغنيه عن الملكـ وعن كلّ شخص يمنّ بيوم من الأيام عليه ...

اقتباس:

تذكر طال عمرك يوم حنا صغار وش كانو يقولون لنا
كانو يقولون الرجال ما يبكي
عيب تطلع دموعه
صرنا نصيح عادي
البكاء صار ملازم لنا
والسبب كومة لحم (أطفال ونساء) في رقبة الواحد
يبكي لأنه عاجز عن توفير الحياة الكريمة لهم

8
8
وربي كلمااات في الصميم ...

الله لا يحرمنا من هالطلّه أخوي خالد...

ممتنّ للمووضوع هذا بالذاات ...

لا عدمنا التوااصل بلا فواااصل ....,,,,,

khaled · 25-Feb-2008, 04:41 PM

والله ياخوي انه مقطع قلبي قبلك مشكور على مرورك

**قلم لا يكسر** · 25-Feb-2008, 06:07 PM

شكرا اخوي خالد على نقل الموضوع لنا

بصراحه انه امر يحزن ويحز في الخاطر
خل زوجتك تصحيك من النوم قبل الفجر
وتقولك أن طفلك ما عنده حليب

الله يعين المسلمين اجمعين

FALEH · 25-Feb-2008, 07:30 PM

لاتبكين يااعيني

رجـ حرآمية ـال · 25-Feb-2008, 08:06 PM

ياربييييييييييه انتو ليه تسذااااا ترا في وحده جبانه هنا ماتحب الــــــ ؟؟؟؟ تخاف <<< اجل يلله مناك ياجبانه

خفير · 25-Feb-2008, 10:23 PM

الله ير....ه من فضله من حيث لا يحتسب

مشكووووووووووور

khaled · 26-Feb-2008, 12:06 AM

مشكورين على المرووور

تاركان · 26-Feb-2008, 04:04 AM

كلمااات .. مذاقها مر .. ولكن .. رائعه ...

والنبي .. صلى الله عليه وسلم .. تحدث عن قهر الرجال ..

والله قهر الرجال .. مب سهل .. يمكن يستسهل من لا يمر عليه ..

تعجبني يا خالد .. يالي إسمك مثل إسمي ..

ما ننحرم من هالطله الرائعه

تحياتي لك

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم

الذين يشاهدون محتوى الموضوع الآن : 1 ( الأعضاء 0 والزوار 1)

رسالة الى الوالد الملك عبدالله

مجلس الأفراد