ضيقت صدر الرياض وسافر الطايف وجاها

الهنوف اللي سرت من نجد وامست بالحويه ***ضيقت صدر الرياض وسافر الطايف وجاها

وانثنى غيم الحجاز لخد نجد النرجسيه ***يوم جاته من زعلها كنها تقصر خطاها

زعلوها وارحلت واخلت قصور الفاخريه ***والحقتني شرهت الزعلان واخطاني رضاها

سافرت والله مخبر اللي يزعلها عليه *** واستباحت لله الخيره سهر عيني وماها

ليتها يوم استباحت دمعة العين الشقيه ***ما استباحت دم قلبي من خلا ها في خلاها

سامح الله ظلمها واطعونها الخضر النديه ***والله يسامح خناجرها ويعفو عن خطاها

عرضتني للهبايب والضما والمهمهيه ***واتركتني للزعل والشووووق والكبر وغلاها

والغلا ما هوب في يديها ولا هو في يديه ***الغلا شي من الله واشهد ان الله عطاها

من غلاها لو توردني على حوض المنيه ***كنها تسقيني الشهد المصفى من شفاها

ومن حلا ها ما توصفها الحرووووف الابجديه ***كيف توصف وردةٍ يبري من العله شذاها

الوروووود تغار منها مزهريه مزهريه ***وإنتباهت عذرها معها يحق إلها تباها

ما يشابهها شبيه ولا يحاليها حليه ***جل ربٍ يوم صورها فرقها عن سواها

لقبلت هيجنت وإن أقفت جذبت السامريه ***وااا عذابي لن عطتني وجهها والا قفاها

إن بدالي وجهها يسعد صباح اليوسفيه ***وإن غشتني نفحت من ليلها يسعد مساها

درةٍ بالموت محروسه وبالبحر محميه ***البحر من دونها والموت الاحمر من وراها

دونها ما غليت وسم اهلي ولا شداد المطيّه ***مرخصٍ فالقاع عمري والثريا في سماها

لايمي يبلا بحب الحضر في عيون بدويه ***في ظروف ما يقارن مستواه بمستواها

الله اقوى يا فقييير القلب ابو نفسٍ غنيه ***مالك الا الصبر والجنه لقاها من لقاها

والهوى اللي يطرح الرجال في يدين اجنبيه ***علتٍ بالجوف لاتبرى ولا يلقى دواها

والهنوف اللي لرد الثار تا خذها الحميه ***شفتها بالعين في قلبي وهي تاخذ قضاها

وشفتها تشتاق تطعني بلا ذنب وخطيه ***كثر ما تشتاق لعماقي وانا اشتاق لدفاها

كل ما عرقت بميسمها تحريت الخويه ***والحقت بالميسم الميسم كذا على عماها

عاقبتني كل يومٍ تلحق الكيه بكيه ***واتعبتني وادركتني والحقت نفسي مداها

وإن تمادت جهزوا قبري وانا بكتب وصيه ***بكتب الله لايعاقبها ويرضالي علاها

العمار تلفها الايام والدنيا مديه ***والسنين تلفني والنار تحرق من وطاها

علموها تلحق الباقي مدام الشمس حيه ***واتغانم مابقى مني وما تطلب فداها

لاتمادى في جفاها والرياح الموسميه ***ما تقدر وقفت الاشجار وتثمن عطاها

وعلموها ما بقالي غير ادن الهاشميه ***كان ترضاها علي والا تهون من جفاها

وانصحوها لا تحمل نفسها نفسٍ بريه ***وذكروها بالقبر لعلها والا عساها

وعلموها علموها لا تطول بالحويه ***ديرةٍ ما هي بديرتها لو اعجبها هواها

الشااعر:: ضيدان بن قضعان


^_^

الله يعطيك العافيه اخوي فالح

صح لسانك ولسان الشاعر

ويعطيك العافيه


وإلى الامام ياعسكر

والله روووعهـ

صح لسانك ولسان شاعرها

تسلم ايديك ياالغلا على الاختيار الرائع


أجمل تحية طيبة لك

يعطيك الف عافية

العفوو...من الكل..بدوون أستثنااء..

..وهذا كله لعيوونك..يالغاالين

يسلمووو فالح ...

قصيدة رااائعة لرااائع في مجال الشعر ....


لا عدمنا التواااصل بلا فواااصل ...,,,,

يسلمووووووووووووووو فوووويلح

صح لسـآنك


خوخه

العفوو....بس أحسني شااعر..بقوول قصيدة...