حب .. مسافات !! .............عادل القهوجي

حب .. مسافات !!

-------------------------------------

وتزيد المسافات
وتكتر المشاوير
ويروح كل التعب
ف لحظة اللقا
يدوب تلج الملل
بدفا الآهات
بشوقى أسمع صوتك
واحتياجك لابتسامتى
بإحساسى بالأمل
وألمس جدار الوطن
لما ياخدنى حضنك
انسى شقا السفر
وانتظارى للمعاد
تتكلم العيون
نبتسم .. ونطير
مهما تزيد المسافات
وتكتر المشاوير




********************


- بتعتقدى فى حب المسافات ؟
- يعنى ايه حب مسافات ؟
- يعنى اتنين بيحبوا بعض .. واحد فى المنيا والتانى فى دمياط مثلا .
- الحب مش وليد المكان .

مازالت تلك الجملة تجول بخاطره .. تخترق كل افكاراه .. " الحب مش وليد المكان " .. يا لها من جملة تلخص كل شىء .. تعترف وتبوح .. تنسجم مع مفرداته .




********************


- احنا اتقابلنا اول مرة امتى ؟
- امبارح .
- لا بجد
- امبارح .
- احنا اتقابلنا من اكتر من 4 سنين .
- خليها امبارح .

تتعمق اكثر فى كلمته " امبارح " .. تتذكر قوله الدائم لها .. " خلى مواعيد الذكريات قريبة " .. تعرف انه يقول هذا من اجل الا تُنسى الذكريات .. تُفنى .. تتوه وسط الاحلام الجديدة .




********************


- بقالنا 4 سنين كل فترة بنتقابل
- مع ان بينا مسافات طويلة
- اه
- هى كده .. شوية نتكلم .. شوية شوية نتفق على معاد .. شوية شوية المسافات الطويلة بتقرّب .. شوية شوية بنتقابل .. قلتلك هى كده .
- تفتكر ممكن يكون فى ... " تصمت فى خجل "
- لسه ..

صدمها .. تسأل نفسها مليون سؤال .. هل حقاً اجابته " لسه " كانت على مقصدها .. هل فهم ما تعنيه من سؤالها .. هل هذه هى حقاً اجابته .. هل هى فعلا " لسه " .. تتردد كثيراً .. تبكى اكثر .. تلعن الوقت وتنتظر اللقاء القادم .




********************


- تعرفى انه عشان نتقابل بقعد 7 ساعات سفر .
- انا بقعد 9 ساعات
- احنا بنتقابل ليه ؟
- جاوبتنى على السؤال ده المرة اللى فاتت .
- انا جاوبت .. بس انتى ماجاوبتيش .
- ماعنديش اجابة .

يسأل نفسه " هل احبها .. هل تحبنى ؟ " .. يحاول تدارك موقفه .. امسك بقلم وراح يكتب على الورقة بعض العمليات الحسابية .. " بقالنا 4 سنين بنتقابل .. 4 مرات فى الشهر .. يعنى 192 معاد .. كل مرة بتقعد 9 ساعات سفر جايه .. و9 زيهم عشان تروح .. يعنى 18 ساعة فى المرة الواحدة .. يعنى 3456 ساعة .. بتقضى 3456 ساعة تعب عشان نتقابل " .. يتأهب ليسأل نفسه .. يعرف انه ليس لديه اجابة .. يصمت .




********************


بعد عامين ..

- بقالنا 6 سنين بنتقابل
- مع ان المسافات زى ما هى طويلة
- اه
- هى كده .. المسافات بتقصر مع اشواق اللقا
- تفتكر ممكن يكون فى ... " تصمت فى خجل "
- لسه ..

تبكى مرة اخرى .. تلعن الوقت اكثر .. تنتظر اللقاء القادم


********************




وتزيد المسافات
وتكتر المشاوير
حاسه بينا بلاد
بينا ألف ميل
دايما يحكمنى خجلى
مش قادرة يوم اقولك
سامحنى .. غصب عنى
انا املى فيك كبير
احساسى انك ف يوم
هتسبق كل شىء
وتجينى فى المعاد
صدقنى هييجى يوم
يتحقق حلمى الجميل
دا انا املى فيك كبير
مهما تزيد المسافات
وتكتر المشاوير




********************




2/8/2007

يعطيك العافية

مشكوووووووووور

مشكوووووووووووووووووور